CLICK HERE FOR BLOGGER TEMPLATES AND MYSPACE LAYOUTS »

عـنــــي أنـــــــــا

صورتي
انسان يزعم أنه صاحب قضية .. في زمان بيعت فيه القضية

-----------------------------

جميع الحقوق محفوظة ، كافة المواد المنشورة في هذا الموقع محفوظة ومحمية بموجب قوانين حقوق النشر والملكية الفكرية لا يجوز نسخ هذه المواد أو إعادة إنتاجها أو نشرها أو تعديلها أو اقتباسها لخلق عمل جديد أو إرسالها أو ترجمتها أو إذاعتها أو إتاحتها للجمهور بأي شكل دون الحصول على إذن كتابي مسبق

الثلاثاء، 7 أكتوبر، 2008

حـــــــسره عليـــنا

إخواني أخواتي ... محبين عماد .... او بالأحرى محبين الغم ، او هادم اللذات ( طبـقاً لنقد لاذع جاءني من احد روادي الاعزاء يدعي اني مش عاجبني حاجه او سوداوي النظره وان الدنيا بخير يعم بس انت اللي مش تمام من جوه .... مهو انا دايماً منكد عليكو ) ما علينا إمبارح كنت ماسك روموت التلفزيون عمـّال أقلب في القنوات إني ألاقي حاجه عدله .... مفيش . طبعا الناس لسه في غيبوبة العيد بأه وازاي كحك العيد يتعمل تمام وازاي ترجعي للموضه تاني وتحطي الميك آب اللي يعيني اتحرمتي منو طول رمضان ويمكن مكونتيش بتنزلي عشانو ، ده بخلاف المسلسلات العقيمه اللي شغــّاله على كام توك شو اهبل ( طبعا ما عدا الجادين اللي بيتناولوا مواضيع تهمنا بجد مش الهلس اللي بنشوفو ) فضلا عن النشرات الإخباريه اللي بتنقلك الحدث على هوى المحطه والدوله التابعه بل ممكن تخفي عنك معلومات قد تضرها ده غير صور الاشلاء والدماء اللي اعتدنا عليها بكل بلاده دون ان تهتز شعره في قفــا احد مننا ( هتقولي القفـا مفيهوش شعر هقولك لأ فيه بص وإتأكد.. طبعا مش هتعرف تشوف قفاك وهيبقى عيب تسأل حد على قفاك يبقى سلم بكلامي اسلملك ) ..
المهم وانا في زخم الاختيارات الكتيره اللي بحكيلكو عليها إز فجــاتن لفت انتباهي برنامج ثقافي ( اوعى مخيـــخك يروح لبعيد ثقافي بالمعنى الاكاديمي مش زي منت فاهم يوحش ) بيتكلم عن الانســـان الآلي أو الروبوت . طبعا بما اني من عشاق التكنوبيكيا قصدي التكنولوجيا فضلت ابقي على هذه المحطه ولا تتعجب حين اقول انها ( سبيس تون بالتحديد سبيس باور )
يحكي هذا البرنامج عن طفره جديده في عالمنا ( عفواً قصدي عالمهم طبعا بفارق نقطتين بما اننا عالم تالت ) وازاي استطاع الغرب انو يسخر شوية اسلاك على شوية برمجه على حبتين تفتيح مخ على كم كبير من اهتمام الدوله بالبحث العلمي وإيلاؤه مرتبه متقدمه من الاهتمامات استطاعو بكل هذه المعطيات البسيطه اختراع آله تقف على قدمين وتنفذ مطالب الانسان بمجرد تفــوّه الصانع بكلمة الأمر
قف او اذهب او احمل او امشي او تناول بل وبلغ الامر ذروته صممو روبوت يفكر وهذا ما يطلق عليه الذكاء الصناعي .. ولا يتعدى اعمار صنــّاع هذه التكنولوجيا ثلاثينيات العمر ..
طبعــاً اخوكم تنـــّـح وطــأطــأت رأسي معلنــاً انتكاسه داخليه على ما وصلنا إليه .. وشعرت بغصة ومرارة في حلقي قومت شربت شوية تمر هندي علشان أبــلـّع محتوى البرنامج المستفز ، وتذكرت اننــا شعب خــرّج للعالم من امثال د/ زويل وغيره ممن نبغو في العلم وحازو على اضواء العالم واحترامهم فضلا عن دكتور مصري اكتشف منذ بضعة ايام علاج للسرطان هذا المرض الخبيث الذي عــلّـم على عتاولة الاطباء الغربيين .... طيب يعني احنا فينا نوابغ اهو أومـــال الخــلل فين ... اومال الإحبـــاط منين .. أومــال اليأس ليه ...
دحنـــا خير جند الارض وديه شهادة الصادق المصدوق ... ليه اتدحدر بينا الحال كده ، حتى انني اصبت بذعر عندما سألني طالب في كلية من المفترض انها كلية قمه عن اذا كان الرئيس مبارك تبع انهي حزب !!!!
يدهوتي وصل بينا الحال للدرجادي مش عارف الولا الريس بتاعو تبع ايه .. ولا على ايه مهو برضو معاه حق هو في غير الوطني .. ده الادب الوطني والاخلاق الوطني .
اخواني اخواتي لست صاحب نظره يؤوسه ولا مظلمه ، اعلم يقينا كم هي بخير امتنا وشبابنا ومواهبنا ولكنــا بحاجه إلى دفعه ، إلى إنتماء إلى رغبه في إصلاح ونهــوض .

واخيرا هل تتفق معي الآن يا من اتهمتني بالتذمر ؟
سأترك تعليقاتكم للرد عليه

2LBGARE2


11 قــل .. فـأ نـا احترم رأيك:

Hossam يقول...

hey man
nice subject
عجبنى اوى موضوعك
بس عندى حاجة عايز اقولها
مصر ابتدت تهتم بحجات زى كده والدليل ان فى شركة تاسست لتعليم الناشئين وبالفعل اول دفعة سافروا وكسبوا وحصلوا على المركز الاول
تقبل مرورى
سلام

صباح الصباح يقول...

اولا مبروك نيو لوك المدونة وبجد احسن من اللون البنى بكتيييييير

المهم.. هوة صح يا عمدة البلد منيلة بنيلة والحرامية شغالين على ودنة والولاد والبنات مقضينها فى البطيخ بس من كتر ما بقيت باسمع واقرا واشوف الهم دة انا اكتئبت ومابقتش عاوز لا اسمع ولا اشوف ولا حتى اقرا

حتى الدستور الجرنان اللى كنت بحبة جدا جدا ما بقتش باطيق اقراة لانة بيخلى لى الدنيا سودددددددددددددددددة

وصح الصورة فعلا سودة بس انا مش عاوز كا شوية حد يقولى لا سودى سودة سودة

انا عارف ان الواقع مرير ومش بس دة مؤلم ومميت احيانا انما انا تعبت ومش قادر اسمع عشان كدة بطلت اقرا جرايد
وكما انا اسف جدا مع ان اسلوبك روعة (مش مجاملة بجد) وباين حقيقى انك شخصية محترمة وجميلة الا انى ما بقتش قادر اقرا ماسى ومصايب anymore

تحياتى جدا

engy يقول...

مبروك على النيولوك الرائع
بس انت عندك حق لكن لازم نحاول على الاقل نعمل حاجه لو الواقع مش عاجبنا
وده واجبنا
سلام

أختكم فى الله يقول...

موضوع هايل

جزاك الله خيرا

عندى تاج فى المدونة لو مفيش مانع عند حضرتك يا ريت تستلمه

موناليزا يقول...

ماتقولش ايه اديتنا مصر قول هندى ايه لمصر

غير معرف يقول...

السلام عليكم
ازيك يا عماد
مين الى قال كدة عليك
:0
:(
انا قرأت دة باين فى البوست الى فات صح
عموما انا مش معاة خالص
انا شايفة انك بتعبر عن رأيك
انت حر بأة تكتب الى انت عايزة
انا شايفة كمان انك بتتدعو اننا نتغير فبتوضح الواقع ليس اكثر
كمان انا فى حجات كتييير اوى مكنتش اعرفها عرفتها بسببك
عموما بالنسبة لموضوعك انا سمعت اننا اصلا اذكى شعوووب العالم
ولا تقلى صينى والا يبانى والا المانى حتى
انا جامدين اوى بس الى يهتم بينا
وبدأوا فعلا بالبعثات الى بيبعتوا المتفوقين بيها برة
اه العيال مبيرجعوش تانى وبيفضلوا برة بس فى الى بيرجع وبيفيدنا وبيحاول يصلح
وطول مانت وغيرك من الناس فاهمين صح وعايزين يغيروا وزينا الى لسة بيفكروا اصلا هيعملوا اية صح وانهى اتجاة هنمشى فية فى التطوير اكيد هنكون احسن
عليك انت بولادك بس ان شاء الله واعمل اقصى ما بوسعك عشان تنمى بيهم اى مهارة حلوة وتنمى ذكائهم كمان
ادعيلى ربنا يوفقنى فى الكلية
نيرة احمد محمود

كيارا يقول...

اولا

مبروووووك علي الاستايل بجد تووووووووحفه

---------

انها كلية قمه عن اذا كان الرئيس مبارك تبع انهي حزب !!!!
يدهوتي وصل بينا الحال للدرجادي مش عارف الولا الريس بتاعو تبع ايه .

---------

بجد تنحت

مش عارفه اقول ايه

احنا بعدنا عن ربنا عشان كده اتدحدر بينا الحال

اختك كيارا

maxbeta3zaman يقول...

أنا زيك يا جيفارا عماد...أتحسر على وضعنا بين الأمم .. باكستان والهند فى غفلة من الغرب عملوا قاعدة علميه وتقنيه ووصلوا للطاقة النوويه وحدهم ..الغرب لما يكون فيه هدف علمى أو مجال عاوز بحث بيعلنو عنه وعلى الفور تجد الجامعات ومراكز البحوث تتقاسم العمل وخلال سنوات عديده يكون الموضوع جهز ..مثلا الأمريكان لما لقو المكووك الفضائى حوادثه كترت وتكلفة الرحلة عاليه ..طرحوا فكرة المصعد الفضائى اعتمادا على الليزر والنانو تكنولوجى ..وشاهدت على النت تصميمات جارى العمل على تطويرها فى كافة المعاهد العلميه لإطلاق أول مصعد يصعد للفضاء ويعود للأرض متسلقا شريطا من ألياف الكربون!!!إذا كنت غاوى اطلاع إكتب فى google searchالبحث space elevator""

habiba يقول...

ازيك ياعماد
اولا مبروك النيو لوك بقى اسيبك شويه اجى الاقيك مبهدل الدنيا كده؟.؟:)

عموما انا شايفاك مش سوداوى ولا حاجه ولا مكتئب
بس انا رايى ان البلد مادام بيطلع منها زويل وبيطلع منها اللى بيشربوا مخدرات يبقى العيب قى الناس
اه يمكن فى الظروف بس برضه
لا مبرر للرزيله ولا الفشل

وبعدين فى حاجه كمان
كل اللى بنقول ده بنفرج بيه عن نفسنا علشان نرتاح وخلاص
يعن فضفضه والسلام
انما لو تقولى الكلام اللى بنقوله من غير حلول للمشاكل ده هيفيد فعليا بايه هقولك بمفيش
وعلشان نقدر نغير لازم نغير بايدينا مش بلساننا وبس

تحياتى جدا
دمت بخير

☼♫♪ عمــاد الدين يــوسف ☼♫♪ يقول...

hosaam
اهلا وسهلا بضيفنا الغالي ، سعيد بالتعرف عليك وعلى مدوناتك المثريه واتمنى تكرار الزياره
تحياتي
==================

صباح الصباح
انا والله مقدّر كل الي انت بتقوله ويمكن بعاني نفس اعراض الملل والخنقه بس هعمل ايه غبت اد ما غبت هترجع وبرضو هتلاقي الامور زي مهيه
تحياتي
==================
engy
الله يبارك فيكي وكويس ان في حد مأيدني
تحياتي
==================

اختكم في الله
اشكر مرورك وانشاء الله احل التاج
تحياتي
==================

موناليزا
اهلا وسهلا بضيفتي الكريمه
شكرا لتعقيبك ومرورك وفي انتظار متابعتك
تحياتي
==================

نيره احمد
بجد انا فخور بكلامك يا نيره وبعتبره شحنة حماس وامل ومبيد قاتل للوساوس التي تغتالني والتي تشككني فيما اكتب
يارب يوفقك في كليتك وكل حياتك يارب
تحياتي
==================

كيارا
انا متاكد ان سبب اي تراجع احنا فيه هو بعدنا عن ربنا وده شئ انا على يقين بيه وفي المقابل رجوعنا لله وكتابه وسنة نبيه هي العلاج الفعال
تحياتي
==================

maxbeta3zaman
سيدي الفاضل ينتابني شعور بالسعاده الكبيره عندما اجد حضرتك تتابع ما اكتبه .
فعلا الهند وباكستان اصبحتا دولتان نوويتان فضلا عن نمر آسيا ماليزيا التي صارت قطب مؤثر في اقتصاد العالم في سنوات معدوده
الله فك كربنا يارب العالمين
تحياتي
==================

habiba
اختي الرقيقه
شكرا على مرورك وتعليقك
وانا على يقين اننا لسه بخير وانشاء الله التغيير عن قريب
تحياتي

مهندس مصري يقول...

فكرتني بالكلمة اللي اتقالت في فيلم ليلة سقوط بغداد
الناس دي سابقانا بـ 100 سنة ضوئية
و الراية إحنا مستلمينها منكسة
قول رأيك بحرية
مش انت اللي سوداوي
بس أغلبية الأخبار و الأحوال بقت سودا دلوقت
حنجيب البياض منين ؟ نكدب يعني