CLICK HERE FOR BLOGGER TEMPLATES AND MYSPACE LAYOUTS »

عـنــــي أنـــــــــا

صورتي
انسان يزعم أنه صاحب قضية .. في زمان بيعت فيه القضية

-----------------------------

جميع الحقوق محفوظة ، كافة المواد المنشورة في هذا الموقع محفوظة ومحمية بموجب قوانين حقوق النشر والملكية الفكرية لا يجوز نسخ هذه المواد أو إعادة إنتاجها أو نشرها أو تعديلها أو اقتباسها لخلق عمل جديد أو إرسالها أو ترجمتها أو إذاعتها أو إتاحتها للجمهور بأي شكل دون الحصول على إذن كتابي مسبق

الأحد، 12 أكتوبر، 2008

تاج اجمل ايامنا التاني على التوالي




الاخــــــت الفاضله ( اختكم في الله ) ... محررة مدونة اجمل ايامنــــا مررت لــي هذا التاج ، واتمنى ان تأتي إجاباتي بكل شفافيه زي شفافية انتخاباتنا كده بالظبط .

أذكـــــــــر ستة أسرار قد لا يكتشفها من يقابلك لأول مره!!!؟

1) ممكن اللي يشوفني يفتكرني مغرور للوهلة الاولى مع اني عكس كده تماما وعشري جدا ، وده يمكن علشان انا انطوائي حبتين

( حلوه انطوائي ديه)وهــادي الطباع .

2) ممكن يفتكر اني بتكلم من منخيري او بالشوكه والسكينه زي ما بيقولو ، ولما ياخد ويدي معايا ونبقى زي السكينه في الحلاوه يدرك اني ابن بلد جدا ومش بحب نظام بابي ومامي .

3) عمر ما حد شافني وسدأ اني 26 سنه او اني متزوج وده طبعاً لاني امور ومسمسم ورياضي شويه والحمد لله على نعمة الصحه

(خمسه وخميسه في وش الحسود ههههههههه ) وكمان لاني مرح وبحب الضحك ، وعليه لاتظهر علامات الكبر عليا وباستعمل كريم حلو للتجاعيد ههههههههههههههههه

4) الحمد لله اي انسان يتجاذب معايا اطراف الحديث يبهر من افكاري وتوجهاتي اللي يوحي بعكسها شكلي ، يعني هو الواحد يلبس كلاسيك تقولو عليه معقد يلبس جينز وكاجوال تقولو عليه شاب تاتا ، دنتو فعلاً شعب تييييييييييييييييييت ، يعني نمشيلكو من غير ؟؟؟ ههههههههههههههههه

5) طبعا اللي يتابع توجهاتي السوداويه ديه وميولي الغامقه ( طبقا لتصنيف الجادين في قائمة اللي مش عاجبهم حاجه وسوداويين ) يصعب عليه تصديق اني انسان رومنسي جدا ومن ابسط المواقف الانسانيه تنهمر دموعك يآمال ، ده غير ان اخوكو كان

( واخدين بالكو من كان ديه ) مدوبهم اتنين هههههههههه

6) كل اللي يعرف اني مولود في دبي وعشت تمناشر سنه هناك يضرب كف على كف ويقولي : ايها الاحمق عد ادراجك ، ويفاجـأ اني برد : خسأت يبن المشفلح نو واي اسيب بلادي ... بجد والله الناس بتستغرب ان اهلي في الخارج وانا في الداخل وآل ايه عايز اصلح ، مش عارف هما صح ولا انا ... ولا اعلم من الحكم في هذا.

الحمد لله الستـــــــــــه الاولانيين عدو على خير ههههههههههه

سبع حاجات نفسك تعملهم!!!

1) بدعوا ربنا يوفقني في مشواري ويثبتني على الحق ويرفع شأني ويكون لكلمتي صدى ووقع طيب على الآذان طول ماانا مع الحق ، ونفسي اكون صحفي ( او محارب كما احب اسمي الصحفي الحر ) لامع من اصحاب القلم المصون من الوشايه والتملق .

2) نفسي الم شمل اسرتي الحبيبه والدي ووالدتي واخواني في بيت يضمنا بكل حب ، طبعا احنا متفشكلين بسبب السفر واغترابنا كلٌ في منفى لدواعي الرزق والدراسه .....الخ

3) نفسي اشكل حزب سياسي بحق وحقيقي مش حزب مخصي من التوجه الواضح الصالح المصلح ، ويشرفني ان اقول كلمة لآ في وجه اي طاغيه واحتسب عند الله العواقب .

4) نفسي ازور كل المعتقلين اللي اضطهضوا وظلموا واخذوا من اهاليهم عدوانا .

5) نفسي في مصر بويندوز جديد عليه انتي فايرس بآخر تحديث وكمان ليه سيريال نمبريعني جاي شرعي مش اللي وثب على الجهاز بالتلصص والسرقه ومن ابو شهرين واقلب ، نفسي مصر تستعيد عافيتها لانها باب الدخول لأمه عظيمه موحده من المحيط للخليج .

6) نفسي في ذريه صالحه تكون عون على الظلم ويكون على ايديهم نصر الاسلام وعزة بلادنا .

7) نفسي دائـمــــاً أرى زوجتي احلى نساء الكون واطهرهن واصلحهن لبيتي واولادي . وبالمناسبه باركولي لان ولي العهد انشاء الله في السكه وادعولي يطلع حد كويس زي عمرو خالد مثلا .

الحمد لله السبع التانيين مروا بسلام

سبع حاجات معرفتش تعملهم!!!

طبعـــــــــــاً بييجي عليا اوقات كتر بزعل على حجات كتير كان نفسي اعملها ومعملتهاش ، وبرجع اقول لعله خير وربنا رايد كده ، بالتالي برتاح شويه

1) من صغري وانا لاعب كوره همام وتمام وكان نفسي اطلع نجم كوره

2) كان نفسي اكمل تعليمي على هوايا مش عى هوى التنسيق ومعادلات التحويل

3) كان نفسي اغتنم فرص كويسه جاتلي ضيعتها بسبب طيش الشباب وقلة الخبره والوعي

4) كان نفسي يكون بايدي ارجع بالزمن كنت هغير كتير من حياتي وهتدارك امور كتير لا يصلح لها ندم

5) كان نفسي اقول لخالي المرحوم اللي رباني بعد نزولي من السفر اني بحبه اوي وان قسوته عليا هي اللي طلعتني راجل قدر المسؤليه وانه كان خايف عليا ، بس الموت كان اسرع من عقلي اللي فهم الحقائق ديه متاخر رحمة الله عليك

6) كان نفسي ملعبش ببنات الناس في ايام كنت فيها احمل غشاوة على عيني ازاحها الله عني واسأله ان يوفق كل من اخطأت بحقه الى مسامحتي

7) نفسي اقضي سنين فاتت كتير من عمري في احضان امي الغليه

سبع حاجات دايما بتقولهم !!!؟

طبعا انا الحمد لله بذكر الله على قد ما اقدر بس لو القصد إفيهـــــات يعني ؟ يمكن

1) اشطه

2) سلاحف

3) سلالم

4) اوبس

5) يا هلا ( وخصوصا في التلفون هههههههههه)

6) تسسسسسسسسسسسس روّح (ههههههههههههههههههههه )

7) اوك

سبع مشكلات فى حياتك ممكن تحلهم بالفلوس!!!

انا مؤمن ان الحل بيد الله على طول وان الفلوس سبب لا غير

يعني لو عندي ازمه ماليه بدعي ربنا يفرجها

سبع أماكن بتحبها!!!

1) صاقية عبد المنعم الصاوي

2) مكان في الامارات على حدود عمان اسمه مدحا

3) نيلنا العظيـــم

4) طبعا قبل ده كلو بيت ربنا

5) شقتي المتواضعه اللي ببرطع فيها على الرغم من ضيقها

6) كلية الاعلام اللي انا منتسب ليها

7) راس البر

سبع أشخاص بحبهم غير بابا وماما واخواتى!!!

1) زوجتـــــي الحبيبه

2) اصدقاء الجامعه

3) خالي رحمة الله عليه

4) رئيس مجلس ادارة جريدة وراء الاحداث استاذي المبجل : جابر المهدي

5) ملهمي الاول / ابراهيم عيسى

6) كاتبي المفضل بلال فضل

7) البطل الذي اعتنق افكاره الثوريه / تشي جيفارا

سبع حاجات بتحبهم قوى!!!

1) القراءه

2) الإطلاع

3) صيد السمك

4) كتابة الشعر

5) احترام رأي الآخرين وان اختلفو معي

6) مدونتي الغاليه

7) عملي كممثل لشركة دعايه وإعلان وعملي كمحرر في جريدة وراء الاحداث

سبع مدونات بتحب تقرالهم!!!

بجد مش مجامله اي مدونة هتلاقوها في المفضله انا بحبها ومؤمن ان الناس ديه هي اللي هتغير مصر بجد

واخيرا يارب تكون اجاباتي على قدر من التواضع والصدق الذي انشده ، واهدي هذا التاج الى صديقتي الغاليه الاستاذه الصحفيه / منى العيسوي محررة مدونة دنيا الحب


2LBGARE2



16 قــل .. فـأ نـا احترم رأيك:

ضد التيار يقول...

اجاباتك حلوة قوى و دمها خفيف

و احلى حاجه انك ماستسلمتش للغربه و فضلت بلدك باحوالها

يارب كل شباب البلد دى تفكر كدا

ومبروك مقدما على البيبى القادم (:

mohamed ghalia يقول...

إجابات حضرتك رائعة تدل على شخصية أروع
ربنا يحققلك كل أحلامك .
وتعرف إنى برده عندى فرصة كبيرة أسافر وأنا برده رافض حاسس فعلا إنى بلدنا محتجانا.
تقبل تحياتى وإعجابى الشديد
دمت بود
بالتوفيق

أكون أو لا أكون يقول...

ياسلام عى الجابات... يعني في التاج السابق أنا قت" الله الله إجاباته جميله"... بس في التاج ده حقول أيــــــه...؟ تحفـــــــــــه...
مبـــــــــــروك على البيبي ...
ربننا يتمم على خيــــر...
ولو عاوز دايما تشوف زوجتك بأحلى صوره... يبقى لازم تفضل تعاملها بما يرضي الله... ودائما بتهمتم "بكل حاجه تخصها"... علشان تعطيها دافع أنها تعمل كل حاجه بحب ومش بس واجب ...

وعجبني فيك تمسكك ببلدك... رغم أن عندك فرصه لحياه أفضل...
لكن الأنسان بيبان بوقت الشده...لما يكون البلد بحاجه أهله مش بيتخلو عنه... ويحاولوا يصلحوا فيه دايماً...
مش اللي بيطفشوا عند أول أزمه... وبس ترجع الامور تمام يرجعوا بكل برود يزاحموا على الجاهز الناس اللي صبرت وتحملت...

يعني حتى التاج عندك مميز...!!!

ساسو يقول...

ياعيني ياعيني علي الاجابات الصريحه
ربنا يوفقك وتحقق كل امانيك ويخليك لزوجتك ولابنك ان شاء الله

طـــائر الليــــل الحـــــزين يقول...
أزال المؤلف هذا التعليق.
طـــائر الليــــل الحـــــزين يقول...

زعيــــــــــم
كيفك . عامل ايه . واحشنا واللهى .
ده بالنسبة للسلام . وبعد كده بالنسبة للتاج .
مفيش احلى من كده رد للأجابات . وطبعا يحسها اللى يعرفك عن قرب . عشان كده حسة انها صريحة جدا . وعموما من غير متقول عليه ببالغ او بجامل . انا بعتبرك من الأشخاص المميزين فى حياتى . وبضيف فرحتى انى عرفتك من خلال الجامعه . عشان انت حد راجل جداااا . وحد واعى ومثقف . وكمان فنان . وعندك طموح انا واثقة ان شاء الله انك هتحققه . عشان ربنا سبحانه وتعالى بيقول اسعى يا عبد وانا اسعى معاك . وبجد انا شيفاك مش مقصر . ده غير انا حد محترم . والناس كلها بتحبك وبتحترمك . انا مشفتش حد شافك ومحبكش خالص . وطبعا اللى ربنا بيحبه بيحبب فيه خلقه . والف مبروك على ولى العهد . ويارب يطلع لأبوه فى كل حاجة . عشان اكيد لما يكبر هيكون فخور انه له اب زيك . تحياتى ليك يا اعز الأصدقاء ............

ماما أمولة يقول...

بجد انا سعيدة جدا اني اتعرفت على شخصية جميلة
اجاباتك واضحة وصريحة ودي اجمل حاجة
ربنا يصلح حالك ويحققلك كل آمالك
ويبارك في مولودك القادم باذن الله
تقديري

ANGHAM ALLAM يقول...

انت اصلا يا عمدة زي
العسل يا باشا محدش
يستجري يقول غير كدة يا عسل

طوبة ذهب وطوبة فضة يقول...

بجد رائع هذا التاج واروع منه اجاباتك الصادقه عليه والف نبروك على ولىالعهد ويشرف بالف يلامه ويطرح لك فيه البركه ويجعله الذريه الصالحه باذن الله

كيارا يقول...

انا مش هقولك مبروك علي التاج

انا هقولك مبروك لينا التاج لانه عرفنا عليك

ومبروك البيبي ويااااااااارب يطلع كويس

MaGn0liA... يقول...

مبروك على ولى العهد يا رب يشرف بالسلامه

و ربنا يكرمك و تحقق اللى بتتمناه

hager za3bal يقول...

اجاباتك جميله اوي بتعرفنا علي شخصيه أجمل..
بجد انت حد جميل اوي وانا اتشرفت اني عرفته
ومبروك علي المولود ان شاء الله يطلع حد كويس
:)
بس بقولك ايه
بلاش شفافيتك تبقي زي الانتخابات والنبي
ههههههههههههههههههه

نيرة و منةالله يقول...

هاى يا عماد
انا نيرة
اجاباتك جامدة
هههههههههههه
عموما
انا عملت مدونة
بس لسة مكتبتش حاجة
اوكى
بس هنكتب ان شاء الله
قريب يعنى
نيرة ومنة الله

☼♫♪ عمــاد الدين يــوسف ☼♫♪ يقول...

ضد التيار
الله يبارك فيكي ، وبشكرك على المجامله
طبعا بلدنا اولى بينا
تحياتي
===================
mohamed ghalia
اخي الحبيب اشكر لك هذا الشعور الطيب واتمنى من الله ان يعم هذا التفكير على مستوى كل شباب مصر
تحياتي
===================

اكون او لا اكون
اختي المقدربه اشكر لكي نصيحتك الغاليه وادعيلي يصلح ربي حالي ويثبتني ، لان كلنا بشر ومعرضون للاخطاء ،فاسال الله عز وجل ان اكون عند حسن ظن نفسي اللوامه وان اتغلب دوما على نظيرتها الأماره بالسوء
تحياتي
====================

ساسو اختي الصغنونه
ايه يعم انت فين ، وايه الغيبه ديه هو كل اللي تبقى عروسه بتنسى اخواتها كده . ماشي ماشي
تحياتي
====================

طائر الليل ( مونمون )
طبعا انتهت كل كلماتي الداله على عرفاني واحاسي بجميلك وجمايلك اللي مغرقاني ، وبجد انا اللي ليا شرف صداقة انسانه زيك
تحياتي
===================

ماما اموله
ماما اموله اهدتني وسام يستقر على صدري .. وبجد انا اللي سعيد ان حضرتك مشرفاني ومنوراني واشكر لحضرتك متابعتك الغاليه لمدونتي المتواضعه
تحياتي
===================

انغام علام
والله مفي عسل غيرك ، ربنايخليكي ليا يااختي الغاليه واكون دايما في محل الثقه والحب
تحياتي
===================

طوبه دهب
شكرا جدا وسرني مرورك وتعليقك
واسال الله ان يستجيب دعواتك وان يكون لي نصيبا فيها ويجزيكي عني خير
تحياتي
===================

كيـــــــكو
اختي الغاليه ، نورتيني وبجد انا شاكر ليكي المجامله واتمنى تطمنيني على
جديدك ؟؟
تحياتي
===================


MaGn0lia
شكرا لكي اختي الكريمه تواجدك معنا ومرورك العطر
تحياتي
===================

هاجر
تلميذتي النجيبه اللي شكلها هتتفوق على الاستاذ
اشكرك على مرورك ومشاركتك وانشاء الله احاول ارتقي بالشفافيه لمستوى الحزب الوطني بلاش الحكومه مع انها كلها حزب وطني ههههههههههههههههه
تحياتي
====================

اختي نيره احمد
الف مبروك علينا وجودك بينا في عالم التدوين ، ويارب تكون الخطوه ديه تاثير
نصيحتي ليكي
عموما انتي هتنورينا كلنا
تحياتي

PrInCeSS BeRy يقول...

تاجك عثل ما شاء الله ووضح كمان ان دمك خفيف ربنا يكرمك

محمد عبد الباسط يقول...

اخي الكريم عماد الدين يوسف

ما ان رايت صورة شيفارا . اغتظت عندما وجدتها انها لا تمت بصله لاسم عماد الدين
نعم كان مناضلا لكن كان شيوعيا وعندنا كم هائل من المناضلين والمجاهدين المسلمين
بالله عليك ان تتقبل نصيحتى على ايه حال وان لم اكن قلتها بافضل طريقة للنصيحه
دمت سالما وتقبل تحياتي

حلم كبير